Saborea a lingua

Saborea a lingua é un blog para contaxiar o gusto polo galego

A sabedoría popular (8): refráns do mes de agosto

0

Estamos xa na recta final do mes de vacacións por excelencia, onde se xuntan festas e festas e onde o verán está en todo o seu esplendor. Xa pasaron as festas da Nosa Señora (que se celebran en multitude de lugares galegos), a Peregrina de Pontevedra, o San Roque de Betanzos… Seguen coas festas de María Pita na Coruña. Comezará mañá mesmo o San Bartolomeo de Noia, e en moitos lugares celebrarán o San Ramón a finais de mes.

Vendo que é un mes de festa, de celebracións e de alegría, imos ver que nos conta o refraneiro popular galego sobre agosto, que, coma sempre, fai alusión a festas, costumes, aos labores do agro, ao tempo.

  • A castaña quere en agosto arder e en setembro beber
  • A chuvia no mes de agosto non é chuvia, é mel e mosto
  • Agosto, frío no rostro
  • En agosto, o porco pon o entrecosto
  • En agosto, sol posto, noite connosco
  • O mes de agostiño fai o bo viño
  • O millo de san Bartolomeu nin é meu nin é teu
  • Pasados os Remedios e san Roque, xa non hai sesta nin merendote
  • Porco agostado é medio cebado
  • Se chove en agosto, non gastes diñeiro en mosto
  • Vale máis nubrado en agosto que sol de setembro
  • Agosto e vendima non son cada día
  • Agosto madura e setembro vendima as uvas
  • Agosto marchou, o que mallou mallou
  • Despois da Peregrina, o inverno vén enriba
  • Aí vén san Lorenzo co caldeiro penso
  • En agosto está a auga tras do toxo
  • Limpa e arranxa a eira cando está agosto á beira

E logo, que pensas?