Rematou o mes de febreiro para deixarlle paso a un marzo que xa recende a primavera, a días máis longos, a luz… Neste mes deixamos atrás o inverno, teremos cambio de hora, celebraremos o Día Internacional da Muller, o Día do Pai, a Semana Santa…

Na cultura popular galega hai multitude de refráns e frases feitas que se refiren e aluden a este mes. Nelas están presentes os labores dos campos, as festividades, o tempo…, e mostran esa parecela de sabedoría popular da que sempre falamos.

A continuación aparece unha pequena escolma, que podería aumentarse e completarse con outros moitos exemplos que seguen presentes no noso idioma.

–A que en marzo velou, tarde acordou.

–A viña do bo amo pódase no marzo; a viña do ruín pódase no abril.

–Cando en marzo chove, e en abril xea, queda maio feito unha criba.

–Cando hai auga e sol en marzo, aparella as cubas e o mazo.

– Cando marzo maiea, maio marcea

–Chuvia en marzo, como a mexeira dun gato.

–Cóbregas en marzo, neves en abril.

–Día de san Xosé, primeira anduriña se ve.

–En marzo, abrigo e pantrigo.

–En marzo, abrigo, mozas e pan de millo.

–En marzo, abrigo, noces, pan e trigo.

–En marzo, cada pingueira quita un carto; e en abril, cada pingueira dá mil.

–Marzo amola e abril esfola.

–Marzo amarzador, se un día é malo, o outro é peor.

–Marzo é a porta, e abril trae a chave, se está posta.

–Marzo marzán, cara de rosas pola mañán, e pola noite cara de can.

–Vendima no regazo, aquel que poda en marzo.

Marzo é un mes de cambios (de estación, de hora…), é un mes que recende a primavera e a sol.