Visita con EFERVESCIENCIA Óseos Cosmos.

Este xoves 19 de abril á 1:15 Alejandro Pérez Ochoa realizará para EFERVESCIENCIA unha visita guiada por Óseos Cosmos no MACUF na Coruña. A visita promete doses de ciencia, arte, África e reflexión. Recomendámola rotundamente.

Estás invitado!

Programa 26 (15-4-06): Óseos Cosmos.

É posible alicatar un baño con azulexos pentagonais sen deixar ocos? Non.

A non ser que empreguemos unha estrutura cuasecristalina. Para elo debemos distorsionar os azulexos segundo unha regras definidas de tal xeito que consigamos cubrir toda a superficie sen ocos xerando un patrón que nunca se repite. Roger Penrose formulou os cuasecristais hai máis de 30 anos. O curioso é que se descubriu que os artistas árabes utilizaban esta sofisticada e moderna teoría matemática nos séculos XIII a XV para decorar as mesquitas de Asia Central.

Mosaico árabe

Mosaico árabe (Fonte: Science)

Óseos Cosmos é unha exposición de microfotografías dixitais de osos e dentes de todas as épocas, dende a australopitecus Luci ata a actualidade. As fotos están seleccionadas polo seu valor estético, de aí que se exhiban nun museo de arte contemporánea, no MACUF na Coruña. Falamos cun dos coautores das fotografías, Alejandro Pérez Ochoa, profesor do Departamento de Paleontoloxía da Universidade Complutense. Ochoa tamén é o coautor dun microscopio confocal portátil para permitir que os museos africanos poidan estudar os seus importantes fósiles de homínidos in situ e sen danar as mostras.

Oso de rata espacial

Oso de rata en crecemento no trasbordador espacial.

Os beneficios obtidos por Óseos Cosmos dan soporte o proxecto de investigación “Cancro e evolución humana” auspiciado pola Universidade de Nova Iorque, o Memorial Sloan-Kettering Cancer Centre da mesma cidade, a USC, e o Museo de Historia Natural de Madrid. Anxo Vidal, investigador Ramón y Cajal da USC, é un dos impulsores deste programa que pretende explorar un novo concepto de investigación do cancro onde se unen a paleontoloxía e a bioloxía molecular.

Anxo Vidal

Anxo Vidal.

 

Concurso. Cal é a temperatura máis baixa que se pode acadar?

                           a) -273,15 ºC

                           b) 0 K

                           c) -479,67 ºF

É imposible non acertar!! 

Programa 25 (8-4-07): O ano do CERN.

Todos coñecemos que os ratos non poden ver aos gatos. Ou mellor dito, non aturan o mexo de felino. Prodúcelles pánico. Grazas a esta habelencia innata, os ratos poden zafarse dun dos seus maiores depredadores. Pero cando os ratos se infectan dun parasito chamado Toxoplasma o que antes era medo convértese en atracción. Un auténtico lavado de cerebro. E claro, rato que gusta do mexo de gato, rato comido. O Toxoplasma pode volver así ás tripas dos gatos onde se reproduce a pracer. Moi hábil forasteiro. Toda está conspiración foi desvelada por científicos estadounidenses en PNAS.

Prevese que en 2007 o CERN, Centro Europeo de Investigación en Partículas, poña a funcionar o LHC, o Gran Colixionador de Hadróns. Con este colosal acelerador de partículas na contorna de Xenebra preténdese dar caza o esquivo bosón de Higgs. Quen o consiga probablemente cace tamén o Nobel. De seguro que hai moitas sorpresas esperando aos físicos.

Para falar de todo isto contamos coa presenza de Fernando Varela, físico experimental membro do cadro de persoal do CERN.

Fernando Varela
Fernando Varela.

Cantos aceleradores de partículas tes na túa casa? Esto é o que preguntamos na rúa. Fernando Varela explícanos porque case todos temos algún nas nosas casas.

No concurso coñecemos como se calcula cando cae o domingo de Pascua.

Programa 25

Programa 24 (1-04-07): Lynn Margulis.

Na radio universitaria CuacFm en A Coruña empézase a emitir os xoves Do the evolution. Un grupo de estudantes de bioloxía e novos investigadores están detrás desta iniciativa de divulgación da bioloxía. Falamos cun deles, Juaquín Vierna.

Neste programa de Efervesciencia tivemos o gran gusto de emitir unha entrevista a Lynn Margulis, primeira Doutora Honoris Causa pola Universidade de Vigo. Moitas das súas ideas forman parte xa dos libros de texto, mentres que outras aínda son obxecto de controversia científica.

Margulis é a autora da teoría da endosimbiose. Partes da célula son, en realidade, bacterias que no proceso evolutivo se asociaron tan intimamente á célula que chegaron a perder a súa individualidade.

Linn Margulis
Lynn Margulis (Fonte: Wikipedia)

Na entrevista descubrimos que cando Margulis ve, por exemplo, unha vaca está a ver cousas nas que os demáis non caemos. Serán as vacas en realidade contedores con patas de quilos e quilos de bacterias?!