Efer 447 (10-10-18) Noite Efervescente desde Guitiriz

 

⇑⇑⇑ Así transcorreu a VI Noite Efervescente que tivo lugar na Casa Habanera de Guitiriz coa presenza dos amigos de AMIPA e ASPABER e a inestimable colaboración dos nosos estreleiros Borja Tosar e Martin Pawley. Tivemos de anfitrioa á Regina Polín, alcaldesa de Guitiriz.

 

Fotóns sen fronteiras

Salvador Bará, profesor de óptica na USC, investiga na medición da contaminación luminosa. As imaxes por satélite revelan que a contaminación luminosa non sabe de fronteiras administrativas. Un lugar como Guitiriz, por exemplo, recibe a meirande parte de contaminación luminosa dos concellos limítrofes.

 

Pinzas ópticas, láseres e o Nobel de Física

Maite Flores, profesora de física da USC, debúllanos o Nobel 2018 de física dedicado ás pinzas ópticas e os láseres de pulsos ultracurtos e de alta intensidade.

 

Efer 446 (3-10-18): Biohacking desde a Open Science Cambre

 

 

 

Open Science Cambre

Iniciamos tempada desde o “Open Science Cambre” onde coñecemos que é o biohacking con Cristina Hernández do BIFI  (Instituto de Biocomputación y Física de Sistemas Complejos – Universidad de Zaragoza). Tamén conversamos con José Viñas (profesor do IES David Buján de Cambre), Hugo (director da “Open Science Cambre”), María Luque (participante na feira, instituto Kursaal de Algeciras) e Cristina Pavisic (Instituto de Instrución Superior Galileo Galilei de Jesi-Italia).

 

Inmunoterapia contra o cancro

Amaia Lujambio é investigadora do Hospital Monte Sinai de Nova Iorque e especialista en cancro de fígado. Con ela debullamos o Nobel de medicina 2018 a James P. Allison e Tasulo Honjo polos seus traballos na inmunoterapia do cancro.

 

AMIT en A Coruña

Coñecemos o encontro da AMIT (Asociación de Mujeres Investigadoras y Tecnólogas) da man da nosa colaboradora Joana Magalhaes e Ana Jesús López (presidenta de AMIT-Galicia).

 

Previa Noite Efervescente

Co noso estreleiro Martin Pawley presentamos a VI Edición da Noite Efervescente que habemos celebrar en Guitiriz.

 

Vén á Noite Efervescente en Guitiriz

 

Astronomía para todos en Guitiriz

A “VI Noite Efervescente” terá lugar en Guitiriz o sábado 6 de outubro. Comezaremos gravando entre 20 e 21h un especial Efervesciencia desde a Casa Habanera de Guitiriz aproveitando a conmemoración do World Space Week, evento global no que participa a Noite Efervescente. E ás 22 h. gozaremos dunha observación pública do ceo desde a Área Recreativa de San Xoan da man dos nosos estreleiros, Martin Pawley, Irene Baspino e Borja Tosar.

Unha festa familiar da astronomía para todas as idades na que contamos como invitados especiais os amigos das asociacións Aspaber Amipa. Agardámoste!

 

Programa e localizacións da VI Noite Efervescente

De 20 a 21 h. Recepción. Gravación de Efervesciencia na casa Habanera de Guitiriz (Localización)
De 21 a 22 h. Tempo de cea libre
De 22 h a 24 h. Observación pública na área recreativa de San Xoan (Localización). Gravación da segunda parte do programa de radio.

A actividade é apta para calquera tipo de público e idade (menores acompañados). Pódese asistir o tempo que cada quen desexe. Recoméndase levar roupa de abrigo á observación nocturna (sempre é mellor levar roupa de abrigo de mais que de menos). Levar bebidas quentes á observación tamén é unha boa opción.

 

Quen organiza a “Noite Efervescente”?

“Noite Efervescente” é unha iniciativa do programa Efervesciencia da Radio Galega-USC e os seus «estreleiros», e no que colabora a Agrupación Astronómica “IO”, a Liga Provincial de Clubs de Ocio de Persoas con Discapacidade Intelectual da Coruña e o Concello de Guitiriz. Nesta edición a “Noite Efervescente” está adherida a World Space Week.

 

Anteriores Noites Efervescentes

Escoita as nosas últimas Noites Efervescentes en Castrelo de Miño e no Observatorio de Cotobade

 

 

Tempada nova, horario novo

Logo das escolmas de verán da Avoa de Einstein retomamos a tempada efervescente con novo horario de emisión os mércores ás 24 horas (ou ás 0:00 horas dos xoves). Así estreamos a tempada o mércores 3 de outubro.