Programas ← Efervesciencia ← Page 87

Programa 5: Nanotecnoloxía (19-11-06)

Nov

2006

Contamos ao inicio do programa as dificultades con que se atopan os investigadores non comunitarios coa conversión das bolsas en contratos.

Conversamos con José Rivas, catedrático de Electromagnetismo da USC. Rivas introdúcenos nunha das ciencias emerxentes da actualidade: a nanotecnoloxía. O noso invitado é o responsable do Instituto Hispano-luso de Nanotecnoloxía de Braga, que actualmente está en fase de construción.

Na “Sección Aleatoria”, Marta Vila entrevista o antropólogo experto en paleoxenética Carlos Lalueza Fox, da Universidade de Barcelona. Lalueza é o gañador do Premio Primas 2005 á divulgación científica, que convocan os Museos Científicos Coruñeses. O libro premiado Cuando éramos caníbales distribúese con La Voz de Galicia este mesmo domingo.

Programa 5 (19-11-06)

Programa 4: Teatro e Semana da Ciencia (12-11-06)

Nov

2006

Nesta edición de Efervesciencia falamos de teatro científico en directo con Mónica González. Mónica é responsable de promoción e cultura científica do CSIC en Galicia, e autora da obra Silencio, cerebro, acción.

Esta obra de teatro dirixida ao público infantil estase a representar polo compañía Buratini por toda Galicia co gallo da Semana da Ciencia. Larraitz Urruzola, de Buratini, contounos a súa experiencia co teatro de ciencia.

Buratini1

O rap do cerebro.

Larraitz, Pedro, Pablo -de Buratini-, e Mónica González (dereita atrás).

Por fin explicamos o misterio da cortina de baño. Isto valeunos para lanzar un concurso con premios interesantes: entrada gratis para os Museos Científicos Coruñeses durante un ano ou entradas para o cine en Lugo, Vigo e A Coruña (xentileza de Yelmo Cineplex) ou en Santiago (grazas a Cines Valle Inclán).

Programa 4 (12-11-06)

Programa 3: Cerebro e Semana da Ciencia (5-11-06)

Nov

2006

Ser investigador novo non é doado. Comentamos o futuro incerto dos investigadores doutores do programa Ramón y Cajal.

A outra cara da moeda é o programa María Barbeito para investigadores predoutorais. Convértense en contratos as antigas bolsas de 3º e 4º ano de doutorado que outorga a Xunta de Galicia. O 62% dos contratados son mulleres. Estarase invertendo a proporción entre investigadores varóns e investigadoras mulleres? Ou ao avanzar na carreira investigadora as mulleres seguirán desaparecendo nun burato negro?

Un dos actos centrais da Semana da Ciencia é unha tripla exposición sobre o Cerebro, da que son comisarios Casto Rivadulla, Xurxo Mariño -colaborador da Radio Galega nas Quimbambas, os martes sobre ás 18:00- Mabel Fraga e Rafa Sixto -especialista en historia da ciencia galega.

Casto Rivadulla e Xurxo Mariño na exposición “A Máquina de Crear Realidades” en Pontedeume.

No tempo da conversa falamos en directo con Casto Rivadulla sobre estas exposicións.

Como se establece o prezo do mexillón cando un barco con 15 toneladas de carga chega a porto?. Explícanolo na “Sección Aleatoria” Gonzalo Temperán, profesor de matemáticas do IES Otero Pedrayo da Coruña, e Eva Mondragón, de OPMEGA. Gonzalo Temperán emprega este exemplo da vida real para explicarlles conceptos matemáticos aos sus alumnos. Máis información en www.douspierre.es

Programa 3 (5-11-06)

Programa 2: Evolución (29-10-06)

Out

2006

Comentamos nesta edición unha nova que apareceu no xornal que nos chamou a atención: unha suposto invasión de “víboras” en Oza dos Ríos. Co asesoramento do herpetólo Pedro Galán Regalado chegamos á conclusión de que se trata de inofensivas cobras. Para saber máis recomendamos o libro Guía de Anfibios e Réptiles de Galicia (Ed. Xerais) e vertebradosibericos.org

No tempo da entrevista tivemos o gustazo de conversar con David Posada, investigador Ramón y Cajal da Universidade de Vigo. Falamos de bioinformática, do virus causante da sida e de excepcións á universalidade do código xenético.

David Posada

No primeiro concurso da tempada regalamos as dúas primeiras entradas para o cine. Contamos coa xentileza de Cines Yelmo Cineplex (A Coruña, Vigo e Lugo) e de Cines Valle Inclán (Santiago).

Programa 2 (29-10-06)